頭一趟打雨戰，雨由昨晚下到比賽當日十二時許 (鳴槍前停過半小時，妄想以為不再下，我實在太天真)。
自姬路回港以後，恭慕簡直瘋狂墜下，完全接唔住，又遇上生平首次淋巴結，做咗藥煲，搞到操練亂晒籠，長野馬前是跑過一次30，一次36，以為足夠，又不小心賽前一星期拉親阿基里斯腱，搞到呢幾日有D擔心完唔到賽。
甫開賽就有所顧忌，一路跑，輕放，細步，希望沒觸動阿基里斯腱，是做到了，跑完沒有惡化，但過程感覺十分疲累，仲辛苦過連馬(沒說笑)，好像沒操過去比賽咁，25-26K仲好地地，但打後逐漸已有"仲有幾多？"的感覺，由此起每個水站都要光顧，到尾十K直情經常望望有冇市民取出可樂饗跑者，結果失望而回…… 就知呢次死梗，肯定會後勁不繼。
全程上落坡不多，路線很容易跑，只是自己不濟，根據往績，往往二月黄金期之後pat pat痕加插的那隻馬都沒有好結果 : 2016萬金石 3:50、2017首爾 3:51、2018長野馬 3:51，好明顯每年二月果轉已peak，來年最好不要這樣太高估自己體力，二三月間只選一隻就好。
這賽季由十一月至現在四隻全馬已完，下隻日光超馬可以輕鬆面對，攞正牌不計時間和盡情飲飲食食。哈哈！:-)