跑完抖左成日先有力寫到今年既感受，跑前已經知道好難做到心目中既理想時間，天文台仲要話落大雨，我有幾次已經想唔去。但划艇跑友話除非賽事取消，如果唔係冇理由唔去。於是最後都收拾行裝，為第一次雨戰做準備。

比賽期間亦一如天氣報告一樣，期間有幾陣暴雨，途中我都萌生左幾次放棄既念頭，心諗都過左一半又大雨啦，依家放棄冇人話你架，但捱左一陣覺得好似又就到，見到又有野食又有人打氣；腳攰就換下速度或者跑慢少少，過左幾k又回復番，過埋西隧都知道一定跑得完，最後真係係今年狀態麻麻下加惡劣天氣下完成到賽事。

最後成績係4：04：53，唔係太好既時間，諗番真係感觸良多，好似我地人生裡面一定會遇到困難，又或者係你最重要既時刻先發生最唔想見到既事，但係如果肯去堅持，可能捱多一陣就會苦盡甘來（就好似尋日比賽完左之後先好天）。

P.S. 最後一班師兄們都等埋我影相先走，真係好感動