跑完番黎已經想寫，但最後都拖左差不多兩個月先寫完。
----------------------------------------------
一直都想參加係日本舉行既馬拉松，原因無他，因為聽講大會氣氛非常好、沿途又有各式各樣既補給品、市民無論係參賽者與非參賽者都非常投入，作為跑手點都要一試。一路以來的首選都係東京馬拉松，但自從東馬成為左六大賽事之後，出賽資格變得極其困難；於是聽從朋友的意見，參加東京地區以外舉行的馬拉松，結果京都馬拉松一抽就中左。

記得每年領取渣馬的號碼布，都有聲稱係嘉年華的活動，但印象中每年都係急急腳拎完就走，可能係攤位唔夠吸引吧。但京都馬拉松就不是了，可能是在室內的關係，冇左果種一拎完就走既感覺。結果係裡面又影下相，玩下血管測試呀、肌膚年齡測試呀，玩完一輪準備走既時候，先知仲有另一層。去度第二層行冇耐就有人提供零度啤酒俾你飲，又有好似祭典既小食攤檔，結果係會場度玩左成兩個鐘先走。

比賽之前果日京都落雨落到好似倒水咁，心諗唔會繼渣馬之後又黎多場雨戰呀。好彩到左比賽當日天朗氣清，雖然好鬼涷 (第一次覺得日本涷過香港)，約左秋駿係京都站中央口等，一齊坐巴士去比賽起點西京極運動場。京都馬拉松起點係運動場裡面，有少少中學生陸運會FEEL。係日本跑手都好守規矩，會去番自己既起跑區，唔會好似香港咁個個剩係識一味向前，阻住精英跑手起步。

京都馬拉松特別既地方係佢既路線會經過好多名勝，包括嵐山既渡月橋、廣澤池、唔同既神社(當然包括終點既平安神宮)、仲有唔同既文字燒(不過唔燒既話其實唔係好睇到)，但全程係旅遊景點跑，似係去玩多過去比賽。但呢種去玩既心情好快就冇左，大約去到15KM位置對小腿好似有少少想抽筋咁，我心諗唔會咁快掛，但唔知係唔係天氣涷，身體唔習慣都唔出奇，於是即刻跑細步少少，唔好俾自己咁快撞牆。

沿路都有好多市民打氣，不斷同你講“頑張って”、“ファイト”，基本上你係唔會放棄，跑跑下突然間聽到 ERIC~ 頑張って~ ，我先至明白係號碼布上寫左自己名有乜用，原來佢地見到你個名係會叫出黎打氣，成件事真係好熱血。不過熱血還熱血，好快去到28KM左右，小腿再一次想抽筋，沿途所有既補給品都唔敢唔食，驚自己冇糖冇鹽，於是乜都食，有紅豆包、有仙貝、有紫菜、有生八橋，去到半路真係食到有D飽。

去到鴨川30KM至32KM落左一場小雨，令到本來係泥地既鴨川變得更加軟淋淋，一過左呢段路之後，雙腿終於頂唔住抽筋，做左幾年黎馬拉松我冇做既野 - 終於要行路了。我開頭仲以為有排行，雖然雙腿真係超痛，但可能因為玩左多次既馬拉松，加上沿途既人不斷既打氣之下，我去到37KM又可以再跑了。

去到最後既終點平安神宮前，42KM係京都市中穿穿插插，又去到景點前，又食又跑。大會既廣播同你講 “お帰り”，真係有種番到屋企既感覺。整體既感覺真係好好，因為發現要攪一個成功既比賽，唔係話有幾多人參加，而係沿途既配套、市民既配合同埋大會既安排。與其話呢個係一場比賽，我比較覺得似係嘉年華。經過今次之後，我更加想試下玩日本唔同既馬拉松，當然最想玩既係東京馬拉松啦，不過太難抽喇，希望下次中到。