上年受傷未能完成HK100, 今年再度挑戰, 但係「孭多咗一包米」重咗5kg, 衝擊銀獎(20小時以內)機會不大, 唯有見步行步。 今年有好朋一齊行, 佢嘅目標係唔畀我DNF, 全程督促!

此路線尤其缺乏練習, 首45km除去年HK100走過一次就無練過, 後55km之中最近的都算大半年前, 幸好上月有一個TNF100, 台北馬拉松, 兩星期前有癲傻200(其中43km)當長課, 加一課衛徑一來回, 希望體力方面無問題。

朝早5:15從灣仔坐大會shuttle bus入北潭涌起點, 朝早約只得8度, 好凍, 仲有兩個鐘先至起步, 唯有搵吓人影相。

今年狀況不足, 長課不足, 減肥失敗, 又經歷過上個月TNF的DNF之痛, HK100特色係首45km很多平路, 後段55km才是主菜, 一定要留力, 但要金銀銅一定要有策略。今次主要係落山快, 平路急速Nordic Walking, 上山... 想快都無得快, 最緊要無抽筋, 免撞牆。

起點: 起步初段上窰郊遊徑, 年年一樣好塞人, 無謂急... 此段所有選手剛剛起步, 體力充沛, 好容易為過人而帶快。基平上我畀佢哋過, 心裏面就講: 一陣見。之後萬宜路, 西灣, 西灣山到鹹田一直順利, 但落浪茄時左𦡀一陣痛, 可能未熱身, 慢慢觀察。鹹田食三份蛋治, 補好水就向大灣出發。

CP1鹹田(02:06): 大灣入面林路是去年受傷位置, 今次特別小心, 不過無驚無險。然後沿麥徑二段經過蚺蛇凹, 赤徑等就向黃石碼頭出發。

CP2黃石(5:25): 黃石比心目中預期到達時間遲半小時, 衝擊20機會又減少一點。食咗大會最後一塊麵包(皮)後, 補點水就出發, 往海下一段路除小許上落斜外好多都係泥路。狀態感覺仍然好好。途中朋友表示, 如果10小時內到達CP5, 衝20仍有機會, 個人底線是24小時, 銅獎, 所以其實沒有太大壓力, 跟住自己計劃保留體力見步行步。

CP3海下(7:33): 舒舒服服到達海下, check point搬前咗幾百米。第一個有杯麵嘅checkpoint, 由於太好食早餐, 一口氣食咗兩個, 休息咗一陣就向榕樹澳出發。住CP4途中首先會行一條好長好長又好悶好悶嘅石屎路, 之後就見到好靚好靚嘅深涌。經過深涌碼頭再行一條好長好長嘅石屎路, 就到榕樹澳。

CP4榕樹澳(9:21): 上一年拗柴捱咗幾十公里後在此退出, 今年順利過CP, 信心又大咗! 食咗啲嘢補好水就向雞公山出發。出發時已經近九個半小時, 要十小時到下一個CP基本上沒有可能, 所以目標改定為24小時, 餘下路程可以舒服一啲。上雞公其實慢慢上, 控制步速其實唔難。到雞公山頂, 天已經開始黑, 戴上頭燈就可以衝落山(落山是個人最有信心的!)。經過45km保留力氣, 從落雞公山開始就過咗好多人, 好快就到CP5企嶺下(水浪窩), 奇怪的是早前的𦡀痛又沒有痛了。

CP5企嶺下(10:53 in / 11:23 out): 由於沒有衝20的包袱, 此CP可以留長一點, 一來是因為雞公頂下山用了不少體力, 二來因為此CP是dropbag的領取地方。食了杯麵, 換了乾淨襪, 就向馬鞍山出發。此段13km, 為整個比賽最遠的兩個CP, 登馬鞍前大家都知會大風, 所以就穿上外套, 果然落昂坪路段風很大, 開始想像大帽山頂時氣溫應該很低。徑過熟悉而又漫長的昂坪, 萬里長城後, 就到CP6基維爾營。

CP6基維爾營(14:54): 這CP雖然是營地, 但非常大風。吃了東西後, 開始覺得眼瞓, 喝了一杯等濃咖啡。但仍然覺得很冷, 忽然聽到義工提到camp fire, 一問之下原來營外有一個特大的營火!! 立即衝出去取暖, 幾分鐘後依依不捨離開, 進入麥徑第五段。經過大老山, 沙田坳道, 進入獅子山郊野公園。這一段平路很多, 便開始以大約10分鐘一公里的Nordic Walking方法向下一個CP出發。

CP7畢架山(16:49): 這個CP留了不久, 吃過喝過後就向城門水塘出發。目標是預留五小時去完成針山, 草山及大帽山。此段從畢架山一直落山到鷹巢山一條長長林路, 橫跨大埔公路到金山郊野公園, 上一條2公里的長斜路後,不久轉入山路便到城門水塘。

CP8城門水塘(18:44): 這個CP看見的選手看起來都很累, 自己也感到了濃濃的睡意, 由於很冷也很餓, 所以要吃一點熱的東西。吃了一個杯麵後, 自知身體太累, 若再吃多一個會很難消化, 改喝了一杯熱熱的磨菇湯。前面會上針山, 先吃一包Gel再上路。針山上了百多級, gel的效果仍未發揮, 累得坐下休息了一會, 然後斷斷續續到了山頂。由於山頂大風沒有久留, 便緩緩下山。到了山腳, 頭燈轉暗, 換了電後便向草山出發, 不繼的上斜而且開始有霧, 附近的參賽者都開始有點神智不清, 有人大叫「我好X眼瞓呀」, 又有人五音不全唱歌。到了山頂後慢慢下山便到最後一個CP - 鉛鑛坳。

CP9 鉛鑛坳 (21:27): 這個CP的選手比上一個CP狀態更差, 其中一位選手一邊吃麵一邊嘔。我只吃了gel , 麵包及喝了一點熱飲便出發, 尚有約2.5小時去完成最後10公里的路, 以當時體力來說, 不能夠休息太久。上山的路沒有太多體力, 每一步都很辛苦, 最後要坐下休息一下。忽然之間感覺到之前吃的gel開始上力, 便事不宜遲一直快走到四方亭, 然後感到體力再次下降, 不過當時離最高點只剩下幾百米的路, 而時間比想像中充裕, 還有一小時十五分鐘下山, 要24小時內完成應該沒有問題。不過最後的路真的很長, 跑了一段後開始沒有力, 一直走到最後200米左右才跑著過終點, 時間是23:33:34。

後記:
1. 坐大會的巴士到荃灣, 原定打算轉東涌線到香港站, 一坐低就瞓著, 坐到中環...
2. 全個比賽一共消化7個杯麵, 應該近期唔會再食。
3. 初段留力好重要, 由CP1排名1552到最後986, 每個CP都追過很多選手。不過其實畢竟都是要跟自己比賽就好了。