明知練唔夠死梗... 睇吓自己去到幾多, 明知體力應付唔到, 而且太多路未試過, 所以全程急行唔跑, 只係落山快, 上山就慢慢上, 開始後計過如果順利應該會喺CP關門前30-60分鐘趕到。
CP1 - 上馬頭峰前, 狀態唔錯, 由於此站無cut-off唔知袋幾多。
CP2 - 烏蛟騰 - 11:15am到達, 袋咗45分鐘, 體力仲算唔錯。
CP3 - 鹿頸 - 2:00pm到, 袋一個鐘, 見到已經有人退出。食咗啲飯團, 體力仍然唔錯, 留唔太耐就出發。
CP4 - 鶴藪 - 4:30pm到達, 淨袋個半鐘, 休息咗一陣, 決定繼續100路線。
CP5 - 粉嶺 - 8:00pm到, 得返半個鐘走盞, 因為龍山條路未試過, 要爆林而且大風吹甩咗好多marker, 去到粉嶺又走錯路, 嘥咗好多時間。落山ITB有啲唔妥, 食咗粒止痛葯睇睇點, 食咗兩碗粥後就出發上北大刀屻。
CP6 - 林錦公路 - 11:06pm到達, 基本上10:57到上年個CP位, 可惜今年搬遠咗。落北大刀屻時可能止痛葯效開始過, ITB又再痛, 不過唔打算再食了, 捱到CP6就算, 始於仲有40+公里路, 而且越上溫度就一路下降, 又好大風。雖然體力仲有好多, 但睇嚟對腳開始表示要收工。而且下星期要去台北跑初馬, 係時候退出。

1. 原本諗住可能到CP4就要退出, 今次算超額完成。
2. 最後捱埋大刀屻, 加上落龍山ITB開始痛... 而且CP6搬遠咗, 上年一落白牛石就到, 今年要跑多一兩公里, 就係咁我11:06先到CP6, 遲咗六分鐘, 唔可以過埋先dropout
3. 大約4:30去到CP4, 一個人生交叉點, 因為可以轉50km, 完成有獎牌, 基本上袋住個半鐘一定可以完成50km賽道。但諗深一層, 其實我都算係100公里DNF, 只不過多個牌, 而且好想知道自己去到幾遠, 幾個月無練山, 下個月HK100想完成就要知道而家有幾多貨, 所以決定轉右
4. 呢個比賽有百事贊助, 但唔知點解幾個CP都得無糖百事... 最需要卡路里的時候提供零卡路里飲品... 無奈 =_=
5. 好多參賽者落山都慢, 我要搵機會爬頭, 之後我上山慢又畀佢哋追返, 過咗CP4之後基本上無乜見過其他參賽者了。
6. 有啲人好明顯好少玩山賽, 有人叫一聲sorry窄路推開人過頭, 沿路都畀人係咁話唔好推, 可惜見唔到佢Bib, 另外好多人過人又唔出聲, 其實好危險。
7. 經過今次之後, 有信心下個月HK100可以24小時完成, 因為條路會易過今次好多, 而且今次經驗可以作為下個月參考。
8. 今年三個長途賽: HK100, LT70, TNF100 都DNF 年頭HK100 因為拗柴受傷無辦法, LT70同TNF都係因為準備不足, 轉咗新工應該可以weekend練多啲山了, 希望下年可以完成!