2015.1.25 渣打馬拉松 - 全馬挑戰組賽後包膠
(相片陸續upload)
Official Time: 3:55:30
Chip Time: 3:54:51
Overall Position: 1544
Gender Position: 1433
Category Position: 310

終於跑埋最後一個比賽，今個跑季都叫完喇！感覺過得好快完咁，今年都係繼續星期三訓練團，但少左人跑，而我亦都冇好好似舊年咁積極幫跑友分析數據，但可幸今年GoDone全馬友叫係比舊年快左啦！至我自己，今年跑得認真麻麻。

上個月城門河皇者全馬跑得唔錯，今次渣馬都叫有期待，於是把心一橫set 3:30做target，當然都係一試，知道唔易的。

比賽前半程21.1km 1:44叫係做到原定進度，不過果陣個步速已經跌到5min/k外，已經知道一定做唔到3:30，所以後半程順住去算。

結果，跑左3年渣打全馬都係衰o係第一個位置手上，就係25km位置出左長青隧道個上斜位，一上完大腿肌肉已經緊哂，pacing直插至6-6.5min/km，之後都再發唔到力，心知目標做唔到、pb做唔到，成績追求已經再冇意義，計過數反正最尾16km jog返去都可以sub4，之後全部hea jog返去算 (當然我隻腳已經痺到發唔到力) ，最後叫係守住4小時內完賽，比個人最佳時間慢左16分鐘，不過呢，追時間只會量力而為，每次跑完全馬都會好開心，點都叫完成第六次全馬。

其實，只要o係跑左2X-30km既時候再整段上斜路，已經夠將我收皮，難為出左西隧36km位置俾偉爸爸過左我頭，俾佢講左句「仲話目標想3:30跑快d呀你！」，只係你未領會到全平路全馬賽、同多上落斜既全馬賽差別有幾大，而我都成功爭取高估左自己能力，今日大脾肌肉比上次皇者全馬酸軟。

不過，最正莫過於跑到銅鑼灣last 1k, 有人俾張我要真普選大型傳單俾我，之後一直舉返終點，冇鏡頭緣既我，都希望多d相搵到。

今個跑季總算完左，整體不過不失啦！全馬有pb，反而控速有信心半馬麻麻地，而且毅行同全馬都兼顧到，叫係咁啦！黎緊暫時都應該唔玩長跑賽住，除非有跑友邀請而我又得閒，黎緊都會幾忙，工作又好、選舉工程都好，希望都可以抽時間跑下步、玩一次完整三鐵比賽啦！